பாதையெங்கிலும்
பாகுபாடுகள்!
பந்தயக் களமெங்கும்
பள்ளம் மேடுகள்!
எல்லையின் குறுக்கே
எலும்புக் கூடுகள்!
மகுடத்தின் பாதையில்
மண்டை ஓடுகள்!
முன்னேற்றப் பாதையில்
முள்வெளிக் காடுகள்!
கழுத்தை இறுக்கும்
கட்டுப்பாடுகள்!
கால் பிடித்திழுக்கும்
கறுப்பு ஆடுகள்!
எடுத்து வைக்கும் ஒவ்வோர் அடியிலும்
விரித்து வைக்கப்பட்டிருக்கும் வலைகள்!
தடுத்து நமை தரையில் வீழ்த்த
அடுத்தடுத்து எழும் அலைகள்!
இனி இலகுவாக இருக்கப்போவதில்லை இலக்குகள் எதுவும்!
இனி சுலபமாக இருக்கப்போவதில்லை வெற்றிகள் எதுவும்!
வழுக்குப் பாறைகளே
வாழ்க்கையின் பாதைகள் என்றானபின்
அழுந்தக் காலுன்ற வேண்டியதன் அவசியத்தை
விழுந்து கிடப்பவனிடம் விசாரிக்க வேண்டியிருக்கிறது!
கிழக்கு வானமே இலக்கு என்றானபின்
நம் முயற்சியின் வேகத்தை மும்மடங்காக்க வேண்டியிருக்கிறது!
சோர்ந்து நிற்கும் ஒவ்வொரு நொடியும்
நமைச் சூழ்ந்து கொள்கிறது சூனியம்!
ஊர்ந்து செல்லும் வரையில் இங்கு
உயர்வு என்பது எப்படி சாத்தியம்?
வேங்கைகளின் பாதையில்
வேகத்தடைகள் பொருட்டல்ல!
வெற்றியோ தோல்வியோ
வேறொருவர் இங்கு பொருப்பல்ல!
பீனிக்சுகளின் அகராதியில்
பின்வாங்கலுக்கு இடமில்லை!
பிரபஞ்சத்தின் உயரங்களில்
பிற்பகல் தாண்டியும் இரவில்லை!
தாமதிக்கும் ஒவ்வோர் நொடியிலும்
தாழிடப்படுகின்றன சில கதவுகள்!
காத்திருப்புகளின் இடைவெளியில்தான்
கலைந்துபோகின்றன பல கனவுகள்!
- நிலவை பாா்த்திபன்
