விட்டுவிடுங்கள் எதிர்ப்பாளர்களே
விரும்பியதைச் சுமக்கட்டும் அவர்கள்!
சம்பிரதாயம் என்கிற பெயரில்
சக மனிதனைச் சுமக்கும்போது
சவத்தின் நினைவு வராதவரை
சங்கடமின்றி சுமந்து வந்து
சந்தோசப்படட்டும் அவர்கள்!
விட்டுவிடுங்கள் எதிர்ப்பாளர்களே
விரும்பியதைச் சுமக்கட்டும் அவர்கள்!
மரபுகளைக் காப்பதற்காய்
மதியிழப்பதே மகிழ்ச்சியெனில்
மனதார சுமந்து சுமந்து
மகத்துவம் பெறட்டும் அவர்கள்!
சுயமரியாதை அழுக்கு தீர
சுத்தமாகக் குளித்த அந்த
சூத்திரத் தோள் சுமையால்
சுபீட்சம் அடையட்டும் அவர்கள்!
விட்டுவிடுங்கள் எதிர்ப்பாளர்களே
விரும்பியதைச் சுமக்கட்டும் அவர்கள்!
குற்ற உணர்வு ஏதுமில்லா
குரு மகா சந்நிதானங்களை
உப்பு மூட்டை தூக்கியாவது
உவகையடையட்டும் அவர்கள்!
ஆறாம் அறிவையே
அதிகச் சுமையென தவிர்த்தவர்கள்
ஆதீனப் பல்லக்கு சுமந்தாவது
ஆனந்தம் அடையட்டும் பாவம்!
விட்டுவிடுங்கள் எதிர்ப்பாளர்களே
விரும்பியதைச் சுமக்கட்டும் அவர்கள்!
- நிலவை பாா்த்திபன்
No comments:
Post a Comment
Comments are always welcome