அராஜக அரசியலின்
அடுத்த கட்டம் இது!
மதவெறி அரசியலால்
மக்கள் அடையும் நஷ்டம் இது!
வெந்த புண்ணில் வேல் பாய்ச்சுவதை
வேடிக்கை பார்க்கும்
பாரதம் இது!
அங்கு இடிந்து கிடப்பவை
இஸ்லாமிய வீடுகள் மட்டுமல்ல!
நல்ல குடிகள் நாட்டின்மீது
கொண்டிருந்த நம்பிக்கையும்தான்!
அங்கு பெயர்ந்து கிடப்பவை
சிறுபான்மையினரின் இல்லச் சுவர்கள் மட்டுமல்ல!
மிச்சம் மீதியிருந்த மனித நேயமும் மத நல்லிணக்கமும்தான்!
ஒருபுறம் கோசாலைகள் எழுப்பிக் கொண்டாடப்படுகின்றன மாடுகள்!
மறுபுரம் கொடூரமாக இடிபடுகின்றன
ஒரு சாராரின் வீடுகள்!
சாய்க்கப்படும் கட்டிடங்களின் பின்னே
சத்தமின்றி எழுப்பப்படுகின்றன
சமத்துவத்திற்கான சமாதிகள்!
சர்வதேசம் உற்றுநோக்கும்
சரித்திரப் பிழையாகின்றன
சாமானியர்களின் மீதான சவாரிகள்!
நேற்றுவரைக் கூடிக் களித்துக் குடியிருந்த வீடுகள்
இன்று வெறும் குப்பை மேடுகள்!
நேற்றுவரை குடும்பங்கள் கூடி வாழ்ந்த கட்டிடங்கள்!
இன்று கற்குவியலாய்ப் போன வெற்றிடங்கள்!
பெயர்ந்து கிடக்கும் ஒவ்வொரு செங்கலிலும்
பெரும்பான்மைச் சமூகத்தை நோக்கிய ஓராயிரம் கேள்விகள்!
அயர்ந்துறங்கும் சிலரின் மனசாட்சியால்
அறம் சாரந்த முன்னெடுப்புகளில்
ஆயிரம் தோல்விகள்!
நூபுர் சர்மாக்கள் நூலிழையில் தப்பிப்பதும்
அஃப்ரீன் பாத்திமாக்கள் மீது
அவதூறுகள் கற்பிப்பதும்
ஆட்சியாளர்களின்
அயோக்கியத்தனத்திற்கான சான்று!
இதைச் சத்தமின்றி ரசிக்கும் யாவரும்
சனாதனச் சாத்தான்களைப் போன்று!
பரிதவிக்கும் மக்களைக் கண்டு
பரிகாசித்துச் சிரிக்கும் சிலரின்
பற்களெங்கும் பாசிசக் கறை!
மதக்கலவரமாக இவை மாறாததே
மரண வியாபாரிகளின் ஒரே குறை!
புல்டோசர்களுக்கென புத்தி எதுவுமில்லை!
முடிவெடுக்கும் அதிகாரம் அதை முடுக்குபவனுக்கும் இல்லை!
இயன்ற விரைவில் அவை
இடம் பெயரலாம்
இந்துக்களின் ஒரு பகுதியினரை நோக்கி!
- நிலவை பாா்த்திபன்
No comments:
Post a Comment
Comments are always welcome