குடிமகனே எழு!

குடியரசு தினமின்று
குடிமகனே எழு!
குருதியை நாட்டிற்கு
கொடுத்தவனைத் தொழு!

தரிசான தேசத்தை உன்
அறிவாலே உழு!
பல கரங்கள் ஒன்றினைந்தால்
ஏதிங்கு பழு!

நம்பிக்கை நூல் கட்டி
இமயத்தை இழு!
இனியாள வேண்டும் நமை
இளைஞர்கள் குழு!

புது இரத்தம் பாய்ந்தால்தான்
புலியாகும் புழு!
தோல்வியையும் தோற்கடிக்கும்
உன் தோளின் வலு!

நடு நடுவே வீழ்ந்தாலும்
நயாக்ராவாய் விழு!
நாடுன்னைப் போற்றும் இனி
தயக்கங்கள் விடு!

எடுத்தால் இனி அகிம்சையெனும்
ஆயுதத்தை எடு!
தேசத்தின் வளர்ச்சியது
தேங்காமல் தடு!

விஞ்ஞான வில்லெடுத்து
அம்புகளைத் தொடு!
தேசத்தின் வளர்ச்சிக்கு
உன் பங்கைக் கொடு!

- நிலவை பார்த்திபன்

உறவுகளே கேளுங்கள்!

எம் எளிமை கண்டு எட்டி நிற்கும் 

உறவுகளே கேளுங்கள்!

எமக்கென்றும் உகந்ததல்ல 

பகட்டுக் குப்பைக் கூளங்கள்!

வெறுத்து எமை ஒதுக்குவதால் 

எமக்கில்லை இழப்புகள்!

எவரின் பொருட்டும் மாறாது 

எமக்கான இயல்புகள்!

உறவு என்ற சொல்லின் பொருளை 

முதலில் உணர்ந்துகொள்ளுங்கள்!

உதாசீனப்படுத்துவதால் 

கிடைப்பதென்ன சொல்லுங்கள்!

உறவுகளை வாழ்த்தும்போதும் 

உள்ளத்தினுள் பேதங்கள்!

சிலரை வாழ்த்தி சிலரைத் தவிர்க்கும் 

வேற்றுமை விநோதங்கள்! 

வாழ்த்துவோர்க்கு நன்றி கூட 

சொல்ல மறுக்கும் மடமைகள் !

காழ்ப்புணர்ச்சி கர்வம்தானா 

உங்களது உடமைகள்?

உயர்வு தாழ்வு பேதத்தோடு 

உறவை அணுகும் சிறுமைகள்!

உள்ளமதில் கள்ளம் கொண்டு 

உதட்டில் சிரிக்கும் கயமைகள்!

வசதி பார்த்து வருவதில்லை 

மனதில் பாச நேசங்கள்!

பணத்தைப் பார்த்து பாசம் வந்தால் 

அவையனைத்தும் வேஷங்கள்!

இரத்த சொந்தம் என்பதெல்லாம் 

வெற்று வார்த்தை ஜாலங்கள்!

சுத்தமான அன்பு ஒன்றே 

உறவின் இரத்த நாளங்கள்!

தரமற்ற சொந்தமெல்லாம் 

தள்ளி கொஞ்சம் நில்லுங்கள்! - உங்கள் 

தயவு எமக்குத் தேவையில்லை 

வழியைப் பார்த்துச் செல்லுங்கள்!

 - நிலவை பார்த்திபன் 

எவனடா இங்கு ஏழை?

தாக்கலானது மக்களவையில்
தரம்கெட்ட ஒரு மசோதா! - இது
சாக்கடை நீரில் மனுதர்மத்தை
சரியாய் சேர்த்த மசாலா!

இது ஜனாதிபதியின் ஒப்புதலோடு
ஜனங்களை ஏய்க்கும் சட்டம்!
இது சமூக நீதியை சாகடிக்க
சில சதிகாரர்களின் திட்டம்!

பொருளாதாரத்தின் பொருள் தெரியாதவர்
மோடி என்னுமொரு ஜென்மம்! - இன்று
பொருளாதாரத்தின் அடிப்படையில் - இட
ஒதுக்கீடென்பது வன்மம்!

எட்டு லட்சங்கள் ஈட்டுபவரெல்லாம்
எதுவுமில்லாத ஏழை!
ஒட்டுத் துணிகூட இல்லா இவருக்கு - இட
ஒதுக்கீட்டில்தான் இனி வேலை!

ஒடுக்கப்பட்டவனின் இட ஒதுக்கீட்டை
முடக்க நினைப்பது முறையா?
இதுவரை அதனை பிச்சையென்றவன்
இன்றதைப் பெறுவது சரியா?

ஆதிக்க சாதி ஏழைகளே - மாதம்
அறுபதாயிரம் போதாதா?
ஆண்டாண்டு காலம் அடங்கி கிடந்தவர்கள் 
ஆறுதல் பெறுவது பொருக்காதா?

உயர்சாதியினரின் ஓட்டுக்காக
முயற்சிகள் பல செய்யும் அரசே!
உலகம் உங்கள் முகத்தில் உமிழ்ந்திடும்
தருணம் வருகுது அருகே!

தைமகளே வருக

கைநிறைய களிப்பு கொண்டு 
தை மகளே வருக! 
வையமெங்கும் தமிழ் செழிக்க 
வரங்கள் கொண்டு தருக! 

பைந்தமிழின் பெருமைதனை 
பறைசாற்றி வருக! 
உழவர் வாழ்வு உயரும் பொருட்டு 
உன்னதங்கள் தருக! 

நைந்துபோன தமிழர் வாழ்வு 
நலம் பெறவே வருக! 
தமிழருக்காய்ப் போராடும் 
தைரியங்கள் தருக! 

பொங்கலிட்டு அழைக்கின்றோம் 
பொன்மகளே வருக! 
பொய்க்காமல் பருவமழை 
பொழியும் நிலை தருக! 

கரும்பு, மஞ்சள், வண்ணக்கோலம் 
காண நீயும் வருக! 
ஜல்லிக்கட்டைக் கண்ணில் காணும் 
நல்ல வரம் தருக! 

புயல் வெள்ளம் ஏதுமில்லா 
புத்தாண்டே வருக! 
புதிய புத்தன் காந்திகளை 
பூமிக்குத் தருக!

பொங்கல் வாழ்த்து

பொலிவுடனே பொங்கட்டும் 
இவ்வாண்டுப் பொங்கல்! 
நிரந்தரமாய் தங்கட்டும் 
நிம்மதி நம் வீட்டில்! 

பொல்லாத குணத்தை எல்லாம் 
போகியிலே தீ வைப்போம்! 
இல்லாத நற்குணங்கள் 
இரவல் வாங்கி சேமிப்போம்! 

உழவு இன்றி 
உலகம் இல்லை 
என்ற உண்மை 
உணருவோம்! 
உழவர் வாழ்வு 
உயர்ந்திடவே 
உறுதியேற்று 
உதவுவோம்! 

கதிரவனின் கருணைக்கு 
நன்றி கூறும் நாளிது! 
கரும்பு மென்று 
கவலை துப்பும் 
களிப்புமிகு நாளிது! 

வெல்லம் அரிசி 
ஒன்றாய் சேர்ந்து 
சொல்லும் செய்தி 
ஒன்றுதான்! 
கள்ளம் இல்லா 
உள்ளமிருந்தால் 
எல்லா நாளும் 
பொங்கல்தான்! 

தைமகளின் பிறந்தநாளை 
தமிழ் மணக்க போற்றுவோம்! 
பகலவனை வணங்கும் நாளில் 
பகைவரையும் வாழ்த்துவோம்! 

பொங்கலோ பொங்கல்

போற்றிக் கொண்டாடிடுவோம்
பொங்கல் திருநாளை!
பொலிவுடன் வரவேற்றிடுவோம்
போகியின் மறுநாளை!

புலரட்டும் பூமிதனில்
புதியதொரு காலை!
புதுப்பானை பொங்கலிட்டு
துவங்குவோம் இந்நாளை!

வேற்றுமைகள் களைந்தெரிய
இது நல்ல வேளை!
இன்னல் துன்பம் அனைத்திற்கும்
இனியில்லை வேலை!

அனைவரையும் இனைத்திடுமினி
அன்பு எனும் சாலை!
ஏற்றமிகு வாழ்வமைந்தால்
எவருமில்லை ஏழை!

தை பிறந்தால் பிறப்பதிங்கே
வழி மட்டுமில்லை!
நம் தோள் வந்து சேருமினி
மகிழ்ச்சியெனும் மாலை!

வறண்ட நிலம் இனியாகும்
வளமான சோலை!
பாலை நிலம் உடுத்தட்டும்
பச்சை வண்ணச் சேலை!

புத்தாண்டென புரிந்துகொள்வோம்
தையின் முதல் நாளை!
புரியாதவர் படித்திடட்டும்
புரட்சிக் கவிஞர் நூலை!

- நிலவை பார்த்திபன்

ஆறறிவு தேவையில்ல

ஒறங்கிப்போன சாமிக்கிங்க
எறங்கி வர நேரமில்ல!
கொரங்கு ஒன்ன விட்டா என்
கொறையச் சொல்ல யாருமில்ல!

ஓஞ்சு போன வயசுலயும்
ஒழைக்காம சோறு இல்ல!
சீக்கு வந்து கெடந்தாலும்
சீந்த ஒரு நாதியில்ல!

எழவெடுத்த ஒலகத்துல
எனக்குன்னு ஏதுமில்ல!
விதி முடியும் நேரம்பாத்து
விழுந்து கெடக்கேன் வீதியில!

ஒத்த வாயி சோறுபோடும்
ஒறவு இல்ல ஊருக்குள்ள!
சோந்துபோன மனசுல நான்
சொமக்காத பாரமில்ல!

நெறைய சொந்தம் இருந்துங்கூட
நெஞ்சுக்குள்ள ஈரமில்ல!
இவிங்க வந்து கொள்ளி வச்சா
வேகாது ஈரக்கொல!

பொதிமாடாப் பொழச்சதெல்லாம்
போதும் இந்த பூமியில!
கூட்டி என்ன போகச்சொல்லி
கும்புடாத சாமியில்ல!

அஞ்சறிவா ஒன்னப் பாத்த
எவனுக்குமே மூளையில்ல!
ஆறுதல காமிக்க
ஆறறிவு தேவையில்ல!

எறங்கி என்ன தேத்துற நீ
எனக்கு இனி மகன் போல!
கொரங்குன்னு ஒன்ன சொன்னா
கோவம் வரும் இனிமேல!

- நிலவை பார்த்திபன்

புத்தாண்டு வாழ்த்து

ஆங்கிலப் புத்தாண்டு
அழகாய்ப் பிறந்தது!
ஆனந்த வாழ்வின்
வாசல்கள் திறந்தது!

நெஞ்சின் பாரமெல்லாம்
நேற்றோடு இறந்தது!
நேர்மறை எண்ணங்கள்
நெஞ்சோடு இணைந்தது!

நம்பிக்கை மழைத்துளி
நம்மை நனைத்தது! - இனி
நன்மைகள் மட்டுமே
நமக்காய் விதித்தது!

புதிய சூரியன்
கிழக்கே உதித்தது! - அது
எதிர்மறை எண்ணங்கள்
எல்லாம் எரித்தது!

மகிழ்ச்சி என்னும் மயில்
தோகை விரித்தது!
மனதில் நம்பிக்கைகள்
மலர்ந்து சிரித்தது!

மடமை எண்ணங்கள்
மங்கி மரித்தது!
திடமான உள்ளம் - அதை
தின்று செரித்தது!

வளமான வாழ்வின்
வழிகள் தெரிந்தது!
பிணிகள் எல்லாம் நம்மை
விட்டுப் பிரிந்தது!

நேற்றோடு போதும்
கண்ணீர் வடித்தது! - இனி
நமை வந்து சேரும்
நமக்குப் பிடித்தது!