பலமுறை பார்க்க நேர்கிறது
அந்தப் பார்வையற்ற இளைஞனை!
மெலிந்த தேகம்!
சராசரிக்கும் சற்றதிகமான உயரம்!
கழுத்துப் பட்டை மற்றும்
கை முனைகளில் பொத்தானிட்டுப்
பூட்டிய முழுக்கை சட்டை!
ஒட்ட வெட்டப்பட்ட தலைமுடி!
படபடத்து இடவலமாக அலையும்
பார்வையற்ற விழிகள்!
பட்டும் படாமல் தரைதட்டியபடி
கையில் ஒரு பிரத்தியேகக் கைத்தடி!
சுற்றியெழும் ஒலிகளைத்
துள்ளியமாக உள்வாங்க வேண்டி
சற்றே தலை திருப்பியபடியான நடை!
மேடு பள்ளம் திருப்பங்களை
மிகச் சரியாக அவதானித்துக் கடக்கும் நேர்த்தியான
அவனது வேகம்
பழக்கப்பட்ட சாலை இது அவனுக்கு
என்பதை பறைசாற்றுகிறது!
பணி நிமித்தமாகவே இந்த
தினசரிப் பேருந்துப் பயணம்
எனப் புரிந்துகொள்ள முடிகிறது!
பெரிய இலக்குகளோ அல்லது
பொருளாதாரத் தேவைகளோ அவனை
யாசகம் பெறுவதையும்
போக்குவரத்து சந்திப்புகளில்
பொருட்கள் விற்பதையும் தாண்டி
பயணப்பட வைத்திருக்கிறது!
அவன்மீது கொண்ட மதிப்பிற்கு
அதுவே காரணமாகவும் இருந்தது!
பார்வைக்கு புலப்படாத இவ்வுலகம்
பழகிப் போயிருக்கக் கூடும் அவனுக்கு!
பார்வையற்ற இவ்வாழ்க்கை
பரீட்சயமாகியிருக்கக் கூடும்
அவனுக்கு!
ஆயினும் அவனைக்
காண நேரும் அனைத்து தருணங்களிலும்
கனமேறித்தான் போகின்றன
கண்களும் மனதும்!
ஏதேனுமோர் வழியில்
என்னாலான உதவியை
அவனுக்குச் செய்யவேண்டுமென
எனக்குள் சொல்லிக்கொள்வேன்!
அவன் சாலை கடக்க எத்தனித்த
சமயமொன்றில்
உதவி செய்ய முயன்ற எனக்கு
உறுதியாக பதில் வந்தது அவனிடமிருந்து
"இல்லை விட்டுவிடுங்கள்
நானே கடந்துவிடுவேன்"
அவன் உறுதியில் தடுமாறிய எனக்கு
உடனடியாகத் தேவைப்பட்டது ஒரு ஊன்றுகோல்!
- நிலவை பாா்த்திபன்
No comments:
Post a Comment
Comments are always welcome