உருவெடுத்த நாள் மே தினம்! - இது
முதலாளித்துவ மூர்க்கத்தை எதிர்த்து
முழக்கங்கள் எழுப்பிய ஓர் தினம்!
தொழிலாளர்களின் தோள் சுமை குறைய
வழி காட்டிய நாள் மே தினம்! - இது
விழிகளில் சிவப்பை ஏந்திய கூட்டம்
விதிகளை மாற்றிய ஓர் தினம்!
பாட்டாளிகளின் பலத்தை இந்த
பார் உணர்ந்த நாள் மே தினம்! - இது
காட்டாறுகளின் கரங்கள் இணைந்து
கடலாய் மாறிய ஓர் தினம்!
விறைப்பு ஏறிய விரல்கள் சேர்ந்து
விடியல் கண்ட நாள் மே தினம்! - இது
வியர்வைத் துளிகளின் விஸ்வரூபத்தை
விழி முன் காட்டிய ஓர் தினம்!
எழுச்சியின் பொருளை எட்டு திசைக்கும்
எடுத்துச் சொன்ன நாள் மே தினம்! - இது
கிளர்ச்சியைக் கண்டு கிரீடங்கள் நடுங்கிய
நிகழ்ச்சியை உணர்த்தும் ஓர் தினம்!
சுரண்டல்வாதிகள் சூடுபட்டதை
சுருங்கச் சொல்லும் நாள் மே தினம்! - இது
சுரக்கும் வியர்வையின் சூட்டில் உலகம்
சுழல்வதை விளக்கும் ஓர் தினம்!
எட்டு மணி நேர உழைப்பெனும் எல்லையை
எட்டிய நாள் அது மே தினம்! - இங்கு
ஒட்டுத் துணியோடு பட்டு நெய்பவனின்
ஒடுங்கிய நிலை என்று மேம்படும்?
- நிலவை பார்த்திபன்
