"விசாரித்துவிட்டு
விடிந்ததும் அனுப்புகிறோம்"!
பதினோராயிரம் விடியல்களை
எதிர்கொள்ள வேண்டியிருந்தது
பாவப்பட்ட அந்த மனிதன்
தன் தாயிடம் வந்து சேர!
பலநூறு கொடுமைகளின்
வலிதாங்க வேண்டியிருந்தது
பரிதாபத்திற்குறிய அவனின்
பாரங்கள் அனைத்தும் தீர!
மின்கலம் இரண்டை
அதன் பின்புலம் அறியாது
வாங்கித் தந்த ஒரு வழக்கு
அதன்பின்னே இருட்டானது அவன் கிழக்கு!
திருத்தப்பட்ட வாக்குமூலங்களாலும்
தீவிரமான சில திரிபு வாதங்களாலும்
துளியும் தொடர்பிலாத ஒரு கொலைக்கு!
தூக்குக் கயிறே தூண்டிலானது
அவன் தலைக்கு!
தூக்கு ஆயுளானது!
துணைக்கு நோயும் சேர்ந்தது!
சிதைந்து போனது இளமை
சிறைக் கம்பிகளின் பின்னே!
புதைந்து கிடந்தது நீதி
இப்புதிய தீர்ப்பிற்கு முன்னே!
இவன் கைவிலங்குகள் கழற்றப்பட்டதில்
சில மனித விலங்குகளுக்கு மகிழ்ச்சியில்லை!
இவன் சிறைக் கதவுகள் திறக்கப்பட்டதில்
சில திமிங்கலங்களுக்கு திருப்தியில்லை!
முப்பத்தோராண்டுகள் சிறைவாசம்!
முடிவில் ஜெயித்தது தாய்ப்பாசம்!
சத்தியம் வென்றதில் சந்தோசம்!
சில சகுனிகள் வயிற்றில் புகை வாசம்!
ஆறேழு நாட்களுக்கினி
பேரறிவாளனே இங்கு பேசுபொருள்!
அற்புதம்மாள்கள் இருக்கும்வரை
பேரறிவாளன்களுக்கு ஏது இருள்?
- நிலவை பாா்த்திபன்
No comments:
Post a Comment
Comments are always welcome