Saturday, September 18, 2021

காணாமல்போன கனவுகள்


 என் கனவுகளில் சில காணாமல் போனதைக் காலம் கடந்து உணர்கிறேன்!

ஒன்று நான் புரண்டு படுத்த இடைவெளியில் அவை உருண்டோடியிருக்கலாம்!

அல்லது நான் கடிகாரம் பார்க்க
கண் விழித்த கனப் பொழுதில்
அவை களவு போயிருக்கலாம்!

காரணம் எதுவாயினும் காணவில்லை என்பது மட்டும் நிஜம்!

இருட்டில் தொலைத்த கனவுகளை
இருவிழி மூடி இப்போதும் தேடுகிறேன்!

சிலப்பல கனவுகள் அவற்றில்
விலை மதிப்பற்றவை என்பதால்
சீக்கிரம் மீட்டெடுக்க
சிரத்தையாய் முயல்கிறேன்!

நீங்கள் பயணிக்கும் வழியில்
பார்க்க நேரலாம் பறிபோன எனது பலவண்ணக் கனவுகளை!

அவ்வாறு காண நேரந்தால் அனுப்பி வையுங்கள் அவைகளை என் திசைநோக்கி!

தொலைந்து போன என் கனவுகள் சிலவற்றிற்கு
தோகை மயிலின் சாயலுண்டு!

சித்தாந்தக் கோட்பாடுகளால்
சிவப்பு நிறமேறிய கனவுகளும்
சில உண்டு!

ஒரு வர்கப் புரட்சியை வளர்த்தெடுக்கும் கனவொன்றை ஒரு வரிப்புலியையொத்த வடிவில் வழியில் நீங்கள் காணக்கூடும்!

பசிகொண்ட சில கனவுகளும் பட்டியலில் உண்டு!

உங்கள் உணர்வுகளை உணவாகக் கேட்குமாயின் உணர்ந்துகொள்ளுங்கள் அவற்றை என் கனவென!

அரை நிர்வாணக் கனவுகளும் அவற்றில் சில உண்டு!
அப்படியே விட்டுவிடுங்கள் அவைகளைக் காணநேர்ந்தால்!

வல்லரசுக் கனவொன்று
வழிதவறி அலையக் கண்டால்
கல்லறைத் தோட்டத்திற்கு
கையோடு அனுப்பி வையுங்கள்!

பளபளப்பாய் சில கனவுகளை பார்க்க நேர்ந்தால் அவை
பகுத்தறிவு சார்ந்த என் பகல் கனவென்றறிக!

பத்திரமாய் அவற்றை ஒப்படைப்பீர்களாயின்
பரிசுண்டு உங்களுக்கு!

நிறமற்ற என் கனவுகள் சிலவற்றையும்
நீங்கள் காண நேரலாம்!

அர்த்தமேதுமின்றி
அடிக்கடி வந்து போனபோதும்
நான் உறக்கத்தில்தான் இருக்கிறேன் என்பதை
உறுதிப்படுத்திய கனவுகள் அவை!

நெருப்பெரியும் வெப்பத்தை நீங்கள்
நெருங்கும்போதே உணர்ந்தால்
சந்தேகமே வேண்டாம்..

அவை சமூகக் கோபங்களைச் சுமந்து நிற்கும் இந்தச் சாமானியனின் கனவுதான்!

வகைப்படுத்த இயலாத மற்றும் வரையறைக்குள் அடங்காத கனவுகளும் இவ்வரிசையில் உண்டு!

இப்படியாக நீள்கிறது
இதுவரை நான் தொலைத்த கனவுகள்!
இயன்றவரை பட்டியலிட்டும்
இன்னும் சில நினைவிலில்லை!

நான் தொலைக்க முயன்றும்
தொலையாத கனவுகளின் பட்டியல்
இதைவிட நீளமானது!
அலைகடலையும் விழுங்குமளவு ஆழமானது!

நீங்களும் என்போல் தொலைத்து அழுதிருக்கலாம்
நிலாக்கால கனவுகள் சிலவற்றை!

நிஜத்தில் சாத்தியப்படாத சில நிகழ்வுகள்
கனவுலகில் கைகூடுமாயின்
யாருக்குத்தான் வருத்தமிருக்காது
அக்கனவுகள் கலையும்போதும்
காணாமல் தொலையும்போதும்!

எதற்கும் ஒருமுறை
உங்கள் தலையணையடியில் தவறாமல் தேடிப்பார்த்து விடுங்கள்!
கிடைத்தாலும் கிடைக்கலாம்
உடைந்த நிலையில்
உங்களின் சில கனவுகள்!

நாம் கனவு தொலைத்த கதை ஒரு புறமிருக்கட்டும்...

இங்கு நிஜத்தை தொலைத்த கூட்டமொன்று நிம்மதியாய் உறங்குவதாக நம்பிக் கொண்டிருக்கிறது!
அல்லது உறங்குவதுபோல் நடித்துக்கொண்டிருக்கிறது!

பரிதாபப்படுவதைவிட பரிகாசிக்க ஏதுமில்லை!

பாவம் அவர்கள்.....

- நிலவை பாா்த்திபன்

No comments:

Post a Comment

Comments are always welcome