வாழ்த்துச் செய்திகளை
வறட்டுப் பார்வையோடு கடந்து செல்கிறேன்!
வழக்கமான நாளாகவே
வருடப் பிறப்பையும் மனதில் கொள்கிறேன்!
ஜனவரி ஒன்றில் மட்டும்
ஜன்னல் திறந்து
கடமைக்கு வாழ்த்திவிட்டு
கதவு சாத்திக்கொள்ளும் சிலரை
நீண்ட நாட்களுக்குப்பின்
நினைவு கூர்கிறேன்!
கனவுகளோடு வரவேற்ற
கடந்த புத்தாண்டை
இன்று கவலைகளோடு
நினைத்து பார்க்க வைத்துவிட்டு
கடந்து போயிருக்கிறது காலம்!
வறண்ட கனவுகளுக்கு
வண்ணமடித்துப் பார்க்கும் ஆசையில்
வருடப் பிறப்பு ஒவ்வொன்றையும்
வரவேற்றுத் தொலைக்கிறோம் நாமும்!
இதோ...
மாறாத நம்பிக்கையோடு
மறுபடியும் அதே
வாழ்த்துகள்
!வாராதோ வசந்தம் என்று
வழிந்துருகும் வாஞ்சைகள்!
இனி என்னிடம் கிழிக்க எதுவுமில்லை என
தன்னிலை விளக்கம் சொல்லிவிட்டு
நிற்கதியாய் நிற்கிறது
நிர்வாண நாட்காட்டி!
நெடுந்தொடர் அலறல்களை
நெடுங்காலமாய் வழங்கிவந்த
தொலைக்காட்சிப் பெட்டியில்
ஜனவரி ஒன்றின் சம்பிரதாயப்படி
நடிகைகளின் பேட்டியும்
நகைச்சுவைப் பட்டிமன்றமும்!
புள்ளிக் கோலங்களின் கீழ்
புத்தாண்டு
வாழ்த்துகள்
சொல்லி வைத்ததுபோல்
அத்தனை வாசல்களிலும்!
நேற்றெல்லாம் காற்றுவாங்கிய
தெருமுனைக் கோவில்களில் இன்று
ஆற்று வெள்ளமாய் ஆயிரம் பக்தர்கள்!
கோரிக்கை பாரங்களால்
கோடி மடங்கு எடையேறிய நிலையில்
கோயில் சிலைகள்!
காப்பித்தூள் வாங்கக்
கடைக்குச் செல்லும் வழியிலும்
"ஹேப்பீ நியூ இயர்" என்று
ஏழெட்டு குரல்கள்!
குறுஞ்செய்தி வாழ்த்துகளுக்கு
நன்றி சொல்லியே
குறுகிப் போயின விரல்கள்!
எப்போதும்போல் பிறந்திருக்கிறது
இப்போதும் புத்தாண்டு!
வாழ்க்கை நாம் கரங்களிலே
வழங்கட்டும் பூச்செண்டு!
- நிலவை பாா்த்திபன்
No comments:
Post a Comment
Comments are always welcome