தைமகளே வருக

கைநிறைய களிப்பு கொண்டு 
தை மகளே வருக! 
வையமெங்கும் தமிழ் செழிக்க 
வரங்கள் கொண்டு தருக! 

பைந்தமிழின் பெருமைதனை 
பறைசாற்றி வருக! 
உழவர் வாழ்வு உயரும் பொருட்டு 
உன்னதங்கள் தருக! 

நைந்துபோன தமிழர் வாழ்வு 
நலம் பெறவே வருக! 
தமிழருக்காய்ப் போராடும் 
தைரியங்கள் தருக! 

பொங்கலிட்டு அழைக்கின்றோம் 
பொன்மகளே வருக! 
பொய்க்காமல் பருவமழை 
பொழியும் நிலை தருக! 

கரும்பு, மஞ்சள், வண்ணக்கோலம் 
காண நீயும் வருக! 
ஜல்லிக்கட்டைக் கண்ணில் காணும் 
நல்ல வரம் தருக! 

புயல் வெள்ளம் ஏதுமில்லா 
புத்தாண்டே வருக! 
புதிய புத்தன் காந்திகளை 
பூமிக்குத் தருக!